A BATALLA DO FUTURO

Ramón Piñeiro (Láncara, 1915 - Castropol, 1990) foi unha das figuras intelectuais máis relevantes da súa xeración e do século XX en Galicia. O seu labor como intelectual acabou cedendo paso a un activismo comprometido co país e coa cultura, e xogou un papel fundamental como pedagogo, ideador e estratega.
Quen foi director literario de Galaxia, resultou ser peza clave na resistencia antifranquista e cultural e na construción dunha Galicia democrática e autónoma, de par que loitou pola extensión do prestixio e dos usos da lingua de noso, contribuíndo coa súa obra a crear un pensamento galego propio, promovendo a análise da economía do país e impulsando un segundo rexurdimento da literatura galega despois da guerra.
Nesta obra, Beatriz García Turnes ofrece unha biografía actualizada que recolle as novidades e os achados que se foron facendo nos últimos anos ao redor do galeguista de Láncara.